Aktualitete

Bashkësia islame e Turqisë: Bitcoin nuk është e përshtatshme me rregullat e fesë Islame

Organi më i lartë religjioz i Turqisë, ka njoftuar se valuta virtuale Bitcoin nuk është e përshtatshme me rregullat e fesë Islame, raporton euronews.

Drejtoria për Çështje Religjioze apo ndryshe e njohur si Diyanet, një organizatë shtetërore që merret me çështjet fetare, ka deklaruar se valutat virtuale janë të hapura ndaj spekulimeve financiare, dhe sipas tyre myslimanëve u ndalohet t’i përdorin, transmeton Telegrafi.

“Blerja apo shitja e valutave virtuale nuk është e përshtatshme me rregullat e Islamit, për faktin se ato lehtë mund të jenë të hapura për spekulime dhe të përdoren për aktiviteteve ilegale, siç është shpëlarja e parave dhe nuk janë nën mbikëqyrjen e auditorit shtetëror”, ka deklaruar Diyanet, duke iu referuar vendimit të marrë gjatë të premtes së kaluar.

Vlera e Bitcoin është rritur muajve të fundit, duke arritur shifrën prej 10 mijë dollarëve. Besohet se më shumë se 3 miliardë valuta virtuale janë duke qarkulluar anembanë globit.

Në prill të këtij viti, Japonia e ka cilësuar si të ligjshme këtë lloj të parasë edhe përkundër faktit që vendet e tjera janë skeptike lidhur me të.

(Telegrafi)